17 de dec. de 2013

Éxito da campaña de recollida de xoguetes

Así levaron onte o maleteiro do coche de Protección Civil, coas bolsas cheas de xoguetes que de maneira altruísta foron doados polas familias do alumnado do Instituto


A calidade da foto non é moi boa mais o que importa é a solidariedade demostrada e a ilusión por intentar conseguir entre todos que este Nadal ningún neno quede sen xoguetes.


12 de dec. de 2013

Campaña solidaria de recollida de xoguetes

Desde a ANPA pedimos a vosa colaboración para a campaña de Nadal "Todos/as somos nenos/as", iniciativa de varias empresas de Pontevedra para a recollida de xoguetes en favor da Fundación Meniños e de calquera outra ONG que o solicite.

O día de recollida das vosas achegas será o vindeiro luns 16 de decembro no propio Instituto por voluntarios de Protección Civil. O alumnado pode deixar os xoguetes na conserxería.

Agradecemos a vosa solidariedade e esforzo.


4 de dec. de 2013

Charla de Orientación Universitaria




O vindeiro martes 10 de decembro, ás 20:00 h., no Paraninfo do IES Sánchez Cantón, vaise impartir unha interesante charla dirixida especialmente a pais/nais e alumnos/as de 4º da ESO e Bacharelato. A charla será impartida polo Servizo de Información, Orientación e Promoción do Estudante da Universidade de Vigo (SIOPE) acerca tanto da Universidade e os seus servizos coma do acceso á mesma.

A entrada é libre ata completar aforo.

Non deixes de asistir para resolver as túas dúbidas!!

4 de nov. de 2013

Revista para as familias do alumnado

A publicación ten como obxectivos achegarlles ás familias información variada ao redor da educación e convidalas a reflexionar sobre aqueles temas que lles preocupan como nais e pais, sen esquecer a actualidade da lingua galega.

31 de out. de 2013

Clases de alemán para ESO e Bacharelato



A FANPA organiza clases de alemán para estudantes de ESO e Bacharelato impartidas por persoal nativo. O prezo para asociados é de 32 euros ao mes.

Consulta aquí a información e ficha de inscrición

28 de out. de 2013

APPS no Sánchez Cantón

O pasado mércores 23 de outubro recibimos na Asemblea Xeral da ANPA a visita da profesora Charo Sánchez-Gabriel, responsable da Biblioteca do Instituto, para informarnos sobre unhas interesantes iniciativas que se están a desenvolver no eido da telefonía móbil e as súas potencialidades como canle de comunicación da comunidade educativa.



APP do Sánchez Cantón: aplicación para Android moi útil para a difusión da identidade do Centro, da oferta de estudios, publicidade das actividades e interacción en xeral co Instituto.
Podedes consultar na ligazón da APP do Sánchez Cantón toda a información e descargar a aplicación.

APPs con Inventor: magnífico traballo realizado polo alumnado de 1º BAC TIC o pasado curso 2012-2013, en colaboración con distintos departamentos, no que se desenvolveron varias aplicacións para descubrir mediante paseos xeolocalizados pola cidade as prazas de Pontevedra, os tesouros do patrimonio cultural da cidade e as árbores máis representativas da zona.
Podedes descargar as aplicacións nesta ligazón APPs con Inventor

Parabéns ao alumnado, aos docentes e á Biblioteca!!

13 de out. de 2013

ASEMBLEA XERAL ORDINARIA curso 2013-2014

Pola presente convócase a todos os pais, nais e titores/as dos alumnos e alumnas pertencentes á ANPA deste Instituto á ASEMBLEA XERAL ORDINARIA que se celebrará no Paraninfo do Centro o vindeiro mércores día 23 de outubro, ás 20.00 horas en primeira convocatoria e ás 20.30 horas en segunda convocatoria, coa seguinte ORDE DO DÍA:

  1. Lectura e aprobación, se procede, da acta da asemblea anterior.
  2. Memoria do curso anterior.
  3. Lectura e aprobación, se procede, das contas do curso 2012-2013.
  4. Proxecto de actividades.
  5. Orzamento do curso 2013-2014.
  6. Novas incorporacións á Xunta Directiva.
  7. Quenda aberta ás palabras.
Pontevedra, 8 de outubro de 2013

O presidente da ANPA

Luis Manuel Araújo Gómez


11 de out. de 2013

Amplíase o prazo para a Consulta Cidadá pola Educación

Prorrógase o prazo para a participación na Consulta Cidadá pola Educación ata o vindeiro día 27 de outubro.

Aquelas persoas que non poideran participar votando nalgunha das mesas habilitadas nos centros ou lugares centrais das cidades poden facelo no sitio web da consulta: http://www.consultaciudadanaporlaeducacion.org/participa.html

8 de out. de 2013

CONSULTA CIDADÁ POLA EDUCACIÓN

Consulta Cidadá pola Educación, promovida pola Plataforma en Defensa do Ensino Público da que forma parte CONFAPA-GALICIA, no marco da que se está desenvolvendo en todo o Estado.


 Comunicado ás familias

3 de out. de 2013

PREPARACIÓN DE EXAMES DE INGLÉS DA UNIVERSIDADE DE CAMBRIDGE 2013-2014

Continúa aberto o prazo para matricularse nos cursos preparatorios dos exames de inglés da Universidade de Cambridge (certificados K.E.T., P.E.T., F.C.E.) que organiza a Federación Provincial de ANPA de Pontevedra.

As clases serán os venres polas tardes.
A cota para os asociados á FANPA é de 35 euros mensuais.
Existe ademáis unha bolsa de libros mediante o sistema de cesión en uso dos libros de texto necesarios para estes cursos.

Tendes toda a información e as fichas de inscrición nesta ligazón da FANPA

29 de set. de 2013

BENVIDOS/AS AO CURSO 2013-2014

Comezamos un novo curso e dende a Directiva da ANPA queremos darvos a benvida a este noso e voso blog. Nada nos gustaría máis que vos involucrásedes neste proxecto para entre todas e todos mellorar o ámbito educativo dos nosos fillos, en colaboración co Centro. Nos vindeiros días faremos a convocatoria da Asemblea Xeral Ordinaria onde renderemos as contas do curso pasado e presentaremos os novos proxectos para este curso.

Desde o Centro achégannos unha iniciativa da Cruz Vermella de Pontevedra para intentar paliar no posible as dificultades que están a padecer moitas familias neste inicio de curso. Este é o texto do comunicado:

Estimado sr/sra:

Ante a actual situación de crise en España, Cruz Vermella puxo en marcha unha estratexia para paliar as súas consecuencias nas familias, especialmente na infancia e persoas maiores. Esta estratexia contempla accións que van desde o reparto de alimentos, productos de hixiene e material escolar ... ata outras encamiñadas a mellorar a empregabilidade e evitar a exclusión social.

Neste sentido desde Cruz Vermella pretendemos ofrecer o noso apoio a tódalas nenas e nenos que teñan dificultades para adquirir o material escolar ou inclusive os libros de texto, polo que pregamos que se detectades esa necesidade nalgún dos vosos alumnos/as do centro educativo, contacten con Cruz Vermella, neste mesmo correo ou nos teléfonos que indicamos, e vos explicaremos como proceder.

Agradecemos de antemán a vosa colaboración e confiamos en que a través do traballo responsable de todos e todas poidamos mitigar as situacións de vulnerabilidade social que viven moitas destas familias.

Un saúdo,

Teresa Álvarez Quicler
Presidenta Provincial
Cruz Roja Española. Pontevedra
Tlf: 986 852115

Podedes ampliar información nesta ligazón de prensa

 

11 de xuño de 2013

Urxente: reunión informativa no Instituto sobre intercambio co Liceo Francés de Londres

Remítennos desde o Instituto unha nota sobre unha reunión hoxe día 11 de xuño, ás 20.00 horas, na Biblioteca do Instituto co alumnado e familias de 1º ESO para informar sobre un intercambio co Liceo Francés de Londres no vindeiro curso 2013-2014.
 

9 de xuño de 2013

BANCO DE LIBROS DE TEXTO


Animámosvos a colaborar co BANCO DE LIBROS DE TEXTO que por segundo ano organiza o Concello de Pontevedra. Nesta iniciativa participa o IES Sánchez Cantón. Consultade nesta ligazón toda a información do Banco de Libros.

Podedes descargar a ficha de solicitude dos libros que necesitades para o próximo curso e dos que queredes doar en Solicitude Banco de Libros


AXUDAS PARA ADQUISICIÓN DE LIBROS DE TEXTO CURSO 2013-2014



 A Consellería de Cultura, Educación e Ordenación Universitaria convoca axudas para a adquisición de libros de texto destinadas ao alumnado de educación primaria, ESO e educación especial para o curso 2013-2014.
Podedes consultar as bases da convocatoria no DOG núm. 103 de 31 de maio de 2013
As solicitudes entregaranse no centro docente en que estea matriculado o alumnado e o prazo para a presentación de instancias do alumnado da ESO será:
  • de 25 de xuño ao 26 de xullo para o alumnado que formalice a matrícula no prazo ordinario
  • de 2 de setembro ao 2 de outubro para o alumnado que formalice matrícula no prazo extraordinario
As instancias poden obterse no enderezo electrónico https://sede.xunta.es ou  http://www.edu.xunta.es

30 de maio de 2013

Cursos de idiomas no estranxeiro 2013

Desde o Instituto achégannos a información sobre o programa de Cursos de idiomas no estranxeiro que pon en marcha a Dirección Xeral de Xuventude e Voluntariado.

Tendes toda a información en http://xuventude.xunta.es/cursos-de-idiomas-no-estranxeiro.html

19 de maio de 2013

Charla no Instituto sobre ORIENTACIÓN UNIVERSITARIA


O vindeiro xoves 23 de maio, ás 20:00 h., no Paraninfo do IES Sánchez Cantón, vaise impartir unha interesante charla dirixida especialmente a pais/nais e alumnos/as de 4º da ESO. A charla será impartida por Ricardo Corderí e Conchi Hermida da Sección de Información, Orientación e Promoción do Estudante da Universidade de Vigo (SIOPE) acerca tanto da Universidade e os seus servizos coma do acceso á mesma.

 

 

Estamos a traballar nunha charla sobre a problemática das drogas na adolescencia.

A información sobre estas charlas e outras novas que consideramos de interese podedes seguila neste blog, ou recibíndoa no voso correo mediante a subscrición ao blog que atoparedes no menú lateral.

8 de maio de 2013

FOLGA XERAL NO ENSINO 9 DE MAIO


Estimadas familias:

Dende a Federación Provincial de ANPA de Pontevedra e a ANPA O Verxel do IES Sánchez Cantón queremos informarvos que a Plataforma en Defensa do Ensino Público, á que pertencemos mediante CEAPA, fai un chamamento a docentes, pais, nais e estudantes a secundar e apoiar a folga no ensino público que terá lugar o xoves 9 de maio para pedir a retirada do proxecto da Lei orgánica de mellora da calidade educativa (LOMCE) e contra os recortes que sofre o sistema educativo, tanto estatal como autonómico.

QUEREMOS UNHA EDUCACIÓN PÚBLICA, IGUALITARIA E DE CALIDADE.







7 de maio de 2013

Banco de libros de texto

Por segundo ano a Concellaría de Benestar Social do Concello de Pontevedra pon en marcha o Banco de Libros de Texto, despois da gran acollida do pasado ano.

É unha boa iniciativa para axudar ás familias e para reciclar os libros de texto que xa non nos fan falla.

Animámosvos a participar, é moi sinxelo seguindo as indicacións do Banco de libros, onde atoparedes toda a información.

6 de maio de 2013

O Sánchez Cantón clasificouse en terceiro lugar na final do Club de Debate, e con sorpresa ...


O equipo do Sánchez Cantón quedou de terceiro clasificado na final galega do Club de Debate que se celebrou o pasado sábado 4 de maio no Auditorio de Galicia de Santiago de Compostela. Os gañadores foron os equipos do CPI dos Dices de Rois e do IES Saturnino Montojo de Ferrol.

O tema de debate foi O galego é unha oportunidade, e o equipo do Instituto debateu con gran convicción, tanto a favor como en contra, ante rivais moi fortes. Detrás había moitas horas de preparación e traballo en común.

O alcalde de Santiago e outras autoridades


Algúns momentos do debate da mañá fronte ao equipo de Ferrol en imaxes:
Debatendo en contra
Helena Egea argumenta fronte o equipo de Ferrol
Sen nervios
María Bará na súa exposición


O apoio audiovisual
Camaradería cos contrincantes
No debate da tarde fronte ao equipo de Ourense tocoulles debatir a favor:
Carlos Pérez defendendo a postura a favor
O xurado
Ao final da xornada o xurado proclamou gañadores en pe de igualdade aos equipos de Rois e Ferrol
Foi tal o bo ambiente entre os participantes e as relacións que xurdiron entre eles que, para sorpresa de todos, decidiron compartir o premio da viaxe cultural e serán os tres primeiros clasificados os que realizarán a excursión de fin de semana a Taramundi a finais do mes de xuño.

Parabéns ao alumnado participante e aos seus preparadores polo esforzo realizado e os resultados acadados!!

Podedes ver todas as imaxes da xornada na páxina do Facebook do Club de Debate
Máis información no xornal dixital PontevedraViva

2 de maio de 2013

Convocados os premios extraordinarios de bacharelato 2012-2013

A Consellería de Cultura, Educación e Ordenación Universitaria convoca os premios extraordinarios de bacharelato para o alumnado que finalice os estudos no curso 2012-2013. O prazo remata o 7 de xuño de 2013.

Podedes consultar a convocatoria no DOG do 30/04/2013

1 de maio de 2013

Actividades de maio

Aqui ven o maio de frores cuberto...



  • Estamos a traballar no calendario doutras charlas a impartir neste mes de maio, unha de orientación académica co S.I.O.P.E. da Universidade de Vigo, e outra sobre alcohol e drogas na mocidade, das que vos iremos dando conta.

  • Lembrámosvos que este sábado 4 de maio o equipo do Instituto do Club de Debate participa en Santiago na final galega co tema "O galego é unha oportunidade". Desde a ANPA queremos desexarlles moita sorte.

21 de abr. de 2013

IMPORTANTE!!: PRAZAS DISPOÑIBLES NA ADMISIÓN DE ALUMNADO

Enlazamos a información do Instituto sobre a dispoñibilidade de prazas para o vindeiro curso e sobre a apertura dun prazo para presentar a documentación para baremar, do 23 de abril ao 3 de maio, posto que nalgúns cursos hai máis solicitudes ca prazas.

19 de abr. de 2013

Conferencia OS MENORES ANTE AS NOVAS TECNOLOXÍAS

Convidámosvos a participar o vindeiro 2 de maio, ás 20.00 horas, nunha interesante charla ofrecida polo responsable do Equipo de investigación Tecnolóxica da Garda Civil, D. José E. Torres Meira, no salón de actos do Sexto Edificio do Museo de Pontevedra.

Explicaranse aos pais e nais que asistan ao acto o funcionamento e as características de sistemas que van desde a telefonía móbil, as redes sociais como Facebook, Tuenti.... así como a mensaxería instantánea ou o chat, as redes P2P ou o Wifi Chat.
Ademais de informar sobre como funcionan e os atractivos e vantaxes que estes sistemas presentan para os mozos e mozas incidirase de xeito especial nos riscos que pode presentar un uso indebido delas, ben de forma consciente ou por descoñecemento dos problemas que poden conlevar. Así, abordaranse aspectos como o acoso (grooming e cyberbullying) ou as URL's perniciosas. Trala explicación, os asistentes poderán facer todas as preguntas que consideren oportunas.

O obxectivo desta actividade é garantir que mozos e mozas poidan gozar das novas tecnoloxías e das grandes posibilidades que estas ofrecen tanto no eido educativo como lúdico e social sen correr riscos, de xeito seguro e poñendo os medios precisos para garantir a seguridade, privacidade e a intimidade dos usuarios.


Viaxe cultural a Barcelona para 1ª de Bacharelato

Esta actividade foi aprobada no Consello Escolar e se desenvolverá entre os días 22 e 28 de xuño de 2013.
Podedes consultar nesta ligazón o plan de viaxe provisional

Infórmannos desde o Instituto de que se amplía o prazo de inscrición desta actividade ata o día 25 de abril, e que se están a redactar uns criterios de participación do alumnado nas actividades culturais. Ver máis información sobre os regulamento de participación

Lembrade que o custe da actividade ten unha bonificación para os/as asociados/as da ANPA.

11 de abr. de 2013

Campamento de inglés organizado pola FANPA

A Fanpa organiza un campamento de inglés para estudantes de ESO e bacharelato. A actividade terá lugar no Albergue Mouriscade de Lalín do 14 ao 21 de xullo.



Hai prezos reducidos para alumnos/as socios/as de ANPAS federadas.

Máis información do campamento

10 de abr. de 2013

O II Salón Formativo EDUGAL celebrarase no Recinto Feiral de Pontevedra os días 12, 13 e 14 de abril de 2013

Unha interesante cita esta fin de semana dirixida a profesionais e familias para promocionar a educación superior.

Os alumnos e alumnas do Sánchez Cantón estarán este venres no Salón.


Segue EDUGAL en Twitter

Segue EDUGAL en Facebook

I Certame de Relato Curto organizado pola FANPA

A FANPA, en colaboración co Concello e a Deputación de Pontevedra, organiza un certame de relato curto en lingua galega no que poden paticipar alumnos e alumnas de centros de ensino público de Pontevedra así como as súas familias.

Repartiranse 800 euros en premios entre as distintas categorías e publicarase un libro colectivo cos relatos gañadores e finalistas.

O prazo para presentar os relatos remata o día 30 de abril.

Máis información nas bases do certame

23 de feb. de 2013

O SÁNCHEZ CANTÓN GAÑADOR DO IV CLUB DE DEBATE DE PONTEVEDRA

O equipo do instituto resultou vencedor no IV Club de Debate de Pontevedra que se celebrou este sábado no Café Moderno, e pasa á final galega que será o 4 de maio en Santiago de Compostela.

A nosa noraboa aos alumnos e alumnas do equipo:

CARLOS PÉREZ MÍGUEZ
ÁLVARO MONTES CAMPOS
CLAUDIA GÓMEZ LÓPEZ
XOÁN GONZÁLEZ RAZQUIN
ANDRÉS CANDELÓN MOLINA
RUBÉN COVELO BUGALLO
DIEGO BARÁ LOURO
MARÍA BARÁ LOURO
ALBA VIDAL PAZOS
HELENA EGEA PIÑEIRO
ANTÓN POMBO GÓMEZ

e aos seus preparadores, os profesores Xosé Manuel Calvo e Xosé Luís Janeiro.

Podedes ver o vídeo da final do debate en http://www.ponte.tv/2013/02/final-club-de-debate/

Tendes máis información nestas ligazóns:
http://pontevedraviva.com/xeral/3131/ies-sanchez-canton-vence-iv-club-debate-representara-pontevedra-fase-galega/

http://www.lavozdegalicia.es/pontevedra/

http://www.farodevigo.es/portada-pontevedra/2013/02/24/mejores-polemistas/763277.html

http://www.facebook.com/pages/Club-de-debate/340173912683525?group_id=0

http://diariodepontevedra.galiciae.com/nova/233104-instituto-sanchez-canton-clasificado-fase-final-club-debate

http://www.pontevedra.eu/actualizate/ies-sanchez-canton-ganador-do-club-de-debate

20 de feb. de 2013

6 de feb. de 2013

Máis información da 2ª edición da ESCOLA DE PAIS

Podedes ver máis información da programación da Escola de Pais que estamos organizando nas seguintes ligazóns:

Folleto informativo

Folleto informativo 2

Ampliamos o prazo de inscrición do 6 ao 14 de febreiro

LEMBRADE QUE A INSCRICIÓN É GRATUÍTA PARA OS/AS SOCIOS/AS DA ANPA

ANULADA A SEMANA BRANCA 1º ESO

Desde a Vicedirección do instituto informan que foi anulada a actividade da Semana Branca de 1º da ESO por problemas organizativos. Reintegrarán ás familias os importes xa aboados.

Máis información nesta ligazón: ver aquí

5 de feb. de 2013

4 de feb. de 2013

2ª edición da Escola de Pais


Despois da boa acollida do curso pasado organizamos a segunda edición da actividade “ESCOLA DE PAIS”, impartida por Dona Sandra Otero Agazzi (Psicóloga Escolar), tratando os seguintes temas: 

1.- As auténticas necesidades dos fillos. 
2.- O desenvolvemento da seguridade emocional. 
3.- O adolescente e o seu mundo. 
4.- Xogando ao seguro e buscando solucións. 
5.- Situacións cotiás de conflito. 

Dita actividade consta de 5 sesións (1 por semana) a impartir os xoves en horario de 20.00 a 22.00 horas, na aula 18 do IES Sánchez Cantón (1º andar), do 21 de febreiro ao 21 de marzo de 2013. En función do número de participantes habilitaríanse outros grupos (en principio está previsto o martes se o grupo supera o número de 12 persoas). 

A actividade é gratuíta para os asociados da ANPA O Verxel e para os non asociados ten un custo de 7 euros.

O prazo para facer a inscrición é do 4 ao 14 de febreiro. O alumno entregará a solicitude ao delegado do seu curso para que este as entregue na Conserxería.


DESCARGA AQUÍ O FORMULARIO

2 de feb. de 2013

O equipo do Sánchez Cantón pasa á final local do IV Club de Debate

Os alumnos e alumnas do noso Centro que participaron hoxe na fase preliminar local do IV Club de Debate do Concello de Pontevedra


conseguiron pasar á final local que se celebrará o vindeiro sábado 23 de febreiro no Café Moderno, na que se enfrontarán ao outro equipo finalista do IES de Ponte Caldelas.


Foi unha intensa xornada na que debateron a favor e en contra do tema "O Estado ten que garantirlle o acceso ao traballo á mocidade".






A nosa noraboa ao equipo participante e aos seus preparadores, os profesores Xosé Luís Janeiro e Xosé Manuel Calvo!!


1 de feb. de 2013

22 de xan. de 2013

Xustificación de faltas do alumnado e autorización para actividades

Infórmannos desde o instituto que se poden descargar os distintos formularios nos seguintes enlaces:


En breve estarán dispoñibles na zona para familias da web do instituto.

Programa de Becas Estudia en Canadá e Benjamín Franklin (EEUU) 2013

Desde o instituto fixéronnos chegar esta información de bolsas de estudios de inglés para o alumnado de 4º da ESO e mocidade entre 16 e 18 anos. Os prazos rematan en febreiro.
Máis información: ver aquí

Viaxe cultural a Italia 2013

O calendario e plan de viaxe provisional pódese consultar no seguinte enlace do instituo: ver aquí

Semana Branca 2013

Podedes consultar a información para as familias no seguinte enlace da web do instituto: ver aquí